‘O triato è vita
nuje simmo ‘o triato
‘e tutte ‘e juorne
tutti protagonisti ncopp’a scena
senza cupione scritto
mpruvvisamm’a parte
a scena aperta.
Nce sta l’amante co core nfiammato
‘o sugnatore ca cerca ‘a luna chiena
pe putè avè ispirazione,
nce sta chillu ca cerca na ragione
‘ncopp’a ogni ccosa e fa ragiunamiente
senza penzà ca ‘a ciorta
cuncede privileggi assaje putiente
a chi comm’o famuso
cugino ‘e Paperino, Gastone ‘o furtunato,
ca ‘a ’ogni passo truvava nu scellino.
Nuje simmo cumpagne, rivale,
furfante, ciarlatane,
parlammo ogni mumento
o tacimm’ pe’ sempe…
Nuje simm’attori e recitamm’a parte,
‘o palcuscenico è a casa, a piazza, a via…
faccia a faccia nventamme parole:
baciammo, abbracciammo,
ce facimme ll’amici e pure ‘e nemici
accuminciammo a recità ‘e primma matina
e fin’a sera vestimmo ‘e panne
ca ce cusimmo ncuollo
da che simmo nate fin‘a morte.
Sulo a notte, quann’ ‘a luce se stuta,
partono ‘e suonne perdute
e s’aiza ‘o sipario ncoppa ‘a scena vuluta!
Liliana Fiocca
9/9/16